粉紅童子《五十九》

媽媽與浩浩在街上逛。
浩浩：「媽媽，點解條街D人唔開心既？」
媽媽：「點解咁講呢？」
浩浩：「佢地都唔笑既。」
媽媽：「咁有時開心都唔一定會笑出來。你而家都冇笑啦，咁你開唔開心丫？」
浩浩：「開架！我好開心架！」
剛好有架26號巴士駛過。
浩浩：「你睇下，2同6都冇笑，佢地就唔開心囉。」

ＸＸＸ

茶點時間，老師問浩浩：「浩浩，你做乜唔食粥呀？」
浩浩：「熊貓先至食竹/粥架！」

XＸＸ

浩浩和治治先後到姨媽的大屋開生日派對，爸爸低調得多，回家吃頓晚飯便是。
浩浩：「點解我同哥哥响姨媽度生日，爸爸响屋企生日既？」

ＸＸＸ

生日派對的重頭戲是姨丈新買的XBOX和KINECT，大玩體感遊戲。其中有個是田徑七項全能，勝方若是舉手慶祝，遊戲內的虚擬角色也會跟著舉手，相當有趣。但這玩意頗為激烈，姨媽笑說跑得快要瀨尿。
浩浩指著電視：「姨媽你快D試下瀨尿，睇下佢瀨唔瀨！」

粉紅童子《五十八》

爸爸洗完澡在抹身，浩浩急大便，搶入廁所。
浩浩：「咦，點解你個咕咕有鬍鬚既？」

ＸＸＸ

一行去香港藝術館看「羅浮雕塑全接觸」展覽。
天降微雨，浩浩很浪漫地問：「太陽係唔係喊呀？」
雕塑展強調有得睇有得摸，浩浩當然不客氣，一手便抓著勇士的咕咕……
離開時仍下著雨，媽媽看到文化中心那邊有新娘在拍照，治治說也看到。媽媽覺得沒可能，因近處有一圍欄，以治治的高度應該看不到遠遠的新娘。
媽媽再問治治怎可能看到，他便指一指「新娘」：原來只是一塊披了白布的石柱。

ＸＸＸ

治治有份家課要寫雙親的職業、他的看法，及將來自己想做甚麽。
治治寫了將來希望能成為一名「保齡球推銷員」。
遠在上海的表哥也相當可愛，希望成為「海洋公園水族館內負責清潔玻璃的潛水員」，因為他覺得「從水裡往外看著觀眾」很威風。

粉紅童子〈五十七〉

浩浩照鏡：「點解Ｄ野反轉左既？」

ＸＸＸ

爸爸浩浩媽媽手拖手三人行，轉入窄路，爸爸媽媽不得不往內靠，把浩浩夾在中間。
浩浩：「點解短左既？」

ＸＸＸ

媽媽叫浩浩起床。
浩浩一手推開：「我想訓左覺先呀！」

ＸＸＸ

治治神作。

粉紅童子＜五十六＞

浩浩問婆婆：「西鐵東鐵個『紅磡』呢，咁仲有冇『白磡』架？」
婆婆：「冇喎。」
浩浩：「咁藍磡呢？」
婆婆：「都冇啫。」
浩浩：「咁黄磡呢？」
婆婆：「都冇啫。」
浩浩：「咁綠磡呢？」

ＸＸＸ

浩浩大便後，媽媽沖廁所。
媽媽：「哎呀，得幾粒仔咋！」
浩浩：「唔係呀，有一舊好大架。」

ＸＸＸ

作句題目：我要快高長大，因為——
治治答案：因為我想自己到公園玩耍。

ＸＸＸ

追追追!!!粉藍色的恐龍咬著治治不放......

改編自英國廣播公司(BBC)〈Walking with Dinosaurs〉的舞台匯演將於聖誕節在香港公映，應大會之邀，花了小半天時間和­治治合作，用相機拍了這條DEMO短片，挺好玩的，又可以激發孩子的想像力 ( 某位小朋友抱怨不知道為甚麼要跑來跑去......但當他看到完成品後，還是覺得好高­興的! )

粉紅童子＜五十五＞

后羿射日by治治

浩浩在家裡左跳右跳，開始冒汗，笨拙地擦拭兩鬢：「唔要呀~~我唔要汗頭呀！」

ＸＸＸ

浩浩在公園邊走邊唱：「Oneday,Twoday,Wednesday,Thursday......」

ＸＸＸ

媽媽：「浩浩食多Ｄ呀！」
浩浩：「我唔食啦，冇心口呀。」（心機與胃口的簡稱）

粉紅童子＜五十四＞

浩浩：爸爸你做咩飲完水，又螺番出黎？傻左咩！
爸爸：我刷緊牙，哴緊口喎......

ＸＸＸ

浩浩拿著一藍一紅燈籠：爸爸，比你㨂一個！
爸爸：我要藍色。
浩浩：但係，藍色係我個喎！
爸爸反了白眼：咁要紅色囉！

ＸＸＸ

爸爸與治治經過建築中的政府總部。
爸爸：呢棟野係新既政府總部！
治治：好野！終於睇到個政府啦！

ＸＸＸ

電視節目模擬殞石撞地球的後果。爸解釋甚麽是「核子冬天」。
爸爸：到時候烏天黑地，冇太陽，就冇植物。冇植物，又餓死Ｄ動物。咁人類就冇曬食物啦。
治治：咁仲有零食！

ＸＸＸ

治治晚飯時說討厭吃雞（意指帶骨的雞塊）。
媽媽：咁你又食麥樂雞？
治治：呢舊雞咁重，麥樂雞輕咁多。

粉紅童子＜五十三＞

鄰居展開裝修工程，拆牆時傳來沉厚重擊聲。
治治：「咩聲黎架？」
治爸：「拆牆。」
治治：「嚇得我丫，仲以為暴龍行緊過黎。」

ＸＸＸＸＸ

治治：「美國人就好啦，有咁多恐龍（化石）。」
治媽：「佢地人多，多人掘啫。可能我地樓下都有呢。」
治治眼睛一閃：「不如聽日攞個叉落街掘囉！」

ＸＸＸＸＸ

治治喝「粟米薏米水」，吐出兩三條絲狀物。
治治：「咩黎架？」
治爸：「粟米鬚。」
治治：「下，Ｄ粟米老左呀？」

ＸＸＸＸＸ

治治在電梯大堂等候時，一邊喊熱，一邊高速跑來跑去。
治爸：「又話熱！仲跑？」
治治：「有風丫嘛！」

親子運吉團

五月三日，為了帶治治看螢火蟲，舉家十一人參加由「發達行」所辦的＄198「螢火蟲1天團 」，行程相當運吉，值得一記。

早上十時，一家大細在九龍塘理想酒店門外集合上旅遊巴。袁氏一家四口來得遲（其實準時，不過其他團友似乎精於此道，早早上車霸位），只好坐在車尾又熱又焗的發動機上。

車程１(約25分鐘） 九龍塘＞大埔大尾篤哥爾夫球練習場
大伙兒在球場逗留約一小時，勉強可以按行程做到「大人細路都可一嘗打哥爾夫球樂趣」……

車程２（約20分鐘） 大尾篤＞沙田龍華酒家
行程「歎乳鴿、沙田雞粥、豆腐花」。對上一次去龍華至少是25年前的事。小公園、孔雀仍在（應不是同一隻吧？）。乳鴿OK。雞粥？含腐竹的粥底尚可，但雞是雪雞雞柳。這樣子的概念「雞」「粥」非常「新鮮」。

車程３（約25分鐘） 沙田＞粉嶺坪輋士多啤利園
「真係今年 Last Call，帶你去有機士多啤梨園，自費選購及採摘新鮮士多啤梨」。小朋友落田玩得幾開心，大朋友又睇得幾開心。

車程４（約15分鐘） 粉嶺＞上水塱原
先以８元任食價「品嚐香滑新鮮豆腐花」，接著步行約10分鐘到濕地農莊，「玩全港獨有、人咁高的滾球『農吐珠』，這個由紐西蘭引入的 Zorb Ball 水陸步行球，玩的時候完全不用濕身卻可體驗在水上飄的滋味；場內另有機械馬玩。」龍吐珠30元玩10分鐘，治治與治媽、姨媽一起玩。小小的治治身處人肉洗衣機裡，險些給絞成碎塊，非常驚險，嚇死池邊掌控相機的治爸。車程５（約30分鐘） 上水＞元朗流浮山
時為5：30pm，豆腐花還未落膈，便要「享用」「鮑魚海鮮餐」……鮑魚＋海鮮＋餐，童叟無欺。

車程６（約30分鐘） 元朗＞大埔松仔園
一家老少拿著電筒，摸黑夜探郊野公園，走了20分鐘斜坡。如果大家運氣好，是「看猶如滿天繁星的螢火蟲」。我們運氣差，只得幾粒腎……模擬圖片

車程７（約20分鐘） 大埔＞九龍塘理想酒店
全人類散曬，應該入去酒店開房大覺訓。

本團建築面積10小時（朝十晚八），搭車運吉共約3小時，飲飲食食2.5小時，上山落山半小時，實用率約四成。
如果我講多兩句，大家實會講「玩左成日，收你＄198，仲想點呀？」
我想行程編排理性D，唔好浪費燃油行大運來揼波鐘囉。

http://hk.deals.travelzoo.com/Guangdong_Macau_HK/570882

PS：治治六歲了！

粉紅童子＜五十二＞

經治爸追問，治治如下解釋他的六格漫畫：

1）有人飲酒
2）飲曬D酒（握著空杯）
3）行街（那三點不明物體是路人）
4）嘔
5）嘔唔出
6）嘔左劈屎

恭賀新禧！

粉紅童子＜五十一＞

父子闊別四月，一起到平台公園踏單車踢足球。
一名多時不見的男孩，手裡拿著一盒好像叫「鎖匙戰士」的玩具，跑過來跟治治玩。
治治：「嘩，你盒野好靚呀！」
男孩：「係呀！要成一百九十九蚊，好貴架！你知唔知幾好笑呀，我爸爸比左二百蚊，佢找番一蚊咋，笑死我！」
治治大笑：「係囉，咁好笑既！比左二百蚊，找番一蚊既！」

ＸＸＸＸＸ

治治那位移居美國的舅父回港過聖誕。
治爸問治治：「其實你知唔知美國舅父即係邊個？」
治治：「唔知喎。」
治爸：「佢係婆婆個仔，你媽媽既哥哥呀！」
治治：「嘩，乜婆婆咁多個仔架（兩個），佢地細個咁曳，阿婆以前咪好辛苦囉！」
治爸：「係你同細佬兩個曳啫，舅父佢地細個好乖架。」
治治：「都辛苦架，阿婆生咁多個，成日要入醫院割肚！」

ＸＸＸＸＸ

婆婆愛作串珠小手工，應承治治在聖誕前替他串一頭大象，但「死線」屆滿，尚欠頭部未能完成。
治治大感不滿：「爭少少，點解唔穿埋佢呀？」
婆婆：「大佬呀，尋晚我已經穿到三更半夜架啦！」
治治更不滿：「咁點解你唔日頭穿啫？」
治媽喝止治治：「咁婆婆日頭都有好多野做家嘛！」
治治：「阿婆退左休都冇工番，邊有野做架！」

粉紅童子＜五十＞

治治：「媽媽，可唔可以生多個新既ＢＢ呀？我好鐘意同ＢＢ玩架。」
治媽：「車！生多個咪棧多個人同你爭野玩，一陣你又唔高興啦！」
治治：「或者新果個ＢＢ會乖Ｄ呢？」

ＸＸＸＸＸ

電視新聞報導雷曼兄弟迷債苦主慘況。
治治：「又係雷曼兄弟？佢兩個咁跩，點解唔拉左佢地啫？」

大韓瘋 x 粉紅童子

治媽、治婆、治治同浩浩上星期四來韓探親自由行，星期日已回港上班上學。

治治一踏出禁區，見到治爸便飛撲過來。但浩浩卻傻下傻下，一時間未能接受一個跳出電腦屏幕的立體爸爸（來韓兩月間，我們每天都用SKYPE視像通話）。

治治知道韓國與香港有一小時的時差，好生羨慕：「爸爸你就好啦，可以早一個鐘頭食飯，早一個鐘頭訓覺。」治爸笑說：「咁而家你都可以架！」

首天行程是酒行CHECK IN執行李和吃晚飯。一家人越過「清溪川」，走了一小段。治治央求治爸讓他「單挑」橫越河道的石塊陣。治爸心想反正掉下淺水裡，大不了回酒店洗澡，便讓他自己跳來跳去。

離開清溪川，治爸在東大門附近隨便選了一間四正的韓式食店，坐下來才知只售BBQ和豬骨湯。韓文未精的治爸叫店員走辣，她也點頭稱好。豈料……連嗜辣的我也有點吃不消，何況兩名童子？於是治爸厚著臉皮，指手畫腳，看看店家有甚麼不辣的食物，答案是雞蛋和紫菜。老太太大廚煎了一隻蛋，我把它弄碎，再用紫菜包小飯團給童子吃，一家老老少少終算捱了第一餐。

第二天是到「COEX HALL」的室內水族館，跟泰國商場的一模一樣，但童子還是看得高高興興的。午飯找了家中式菜館，辣是不辣了，但千里迢迢來到韓國，吃港式炒麵天理何在？飯後大小B一起倒頭大睡，錯過了由三星開設的「兒童博物館」。入夜後，返正就腳，我們便改變行程提早到LOTTE WORLD（一所巨大室內遊樂場／荔園）。晚上七時後入場票價平了三份二，於是找飯吃拖延時間。今次找了間小館子，吃了水準之下的刀削麵和餃子，真令人洩氣。

第三天去了地鐵直達的「兒童大公園」，免費入場，內設溫室荷花池草坡大沙地、規模不少的機動遊戲區，了無新意。但動物園卻十分精彩，大象老虎獅子花豹黑熊駝鳥班馬駱駝猴子猩猩狒狒雀雀，應有盡有，可憐的只是那些野生動物被關在這樣狹小的空間。浩浩指著大象，咦咦哦哦，唔知講乜。治治則幻想大象是一條活生生的腕龍。

治治興起，教婆婆英文：「你知唔知『慈母龍』英文係咩丫？」
婆婆笑：「我鬼識咩！」
治治得戚樣：「係 Maiasaura 呀！咁你又知唔知兩條『慈母龍』英文係咩丫？」
婆婆笑：「都話唔識咯！」
治治更得戚樣：「係 Maiasauras 呀！」

逛完動物園，午飯隨意在小食亭買了辣年糕、關東煮魚卷、鹵蛋、串燒等小食便算了。
晚上的「境點」，我在「明洞」和「仁寺洞」兩地作了一個錯誤的選擇，揀了「明洞」。星期六晚的「明洞」跟旺角一樣人多，舉家受不了，求其鑽入一家吃蔘雞湯的食店，點了招牌湯和醬油炆雞。蔘雞湯既不蔘又不雞，滿以為不辣的醬油炆雞又是辣的……氣死。

飯後舉家搭的士離開「明洞」，去了首爾火車總站的「LOTTE MART」買手信。回到酒店大家已累死，但治爸仍跑到樓下食店點了客魚生外賣。看著大廚活宰游水鮮魚，心裡一陣難過。除了像日本魚生一樣點青芥末醬油，韓式食法是生魚片點麵豉醬，用芝麻葉／苦生菜包起來，另可加生蒜片和青辣椒。二人份量要價兩萬韓元，比我公寓旁的街坊食店足足貴上一倍。

最後一天，午機返。舉家大清早執拾行李吃早點，然後到仁川機場「觀光」。午飯也當然在機場解決，今次選了間外表高檔的韓食店，第一次吃石鍋拌飯、牛骨湯、冷麵、煎薄餅，每一道菜都不錯，總算讓袁家對韓食挽回了半點信心（其實到大學區搵食才是皇道，又平又多選擇）。

八月治爸來韓時，治治他們到機場送我。那時我的心情不知多輕鬆（因為剛完成北京地獄式的工作，像放監似的）。但星期天則是我送他們回港。傻下傻下的浩浩當然不懂得是甚麼一回事，最多是爸爸由3D變回2D罷了。但已懂事的治治，眼淚一直掛在眼角，看得心痛。

碩士班裡有一名同學仔家在韓國南部，距離首爾三小時車程。她告訴我，每次回鄉探親後，獨個兒從鄉間乘火車回首爾，那種孤寂叫她最難受。我在星期天那程返回市中心的機場巴士裡，深深體會到她的感覺。

粉紅童子＜四十八＞

舊稿大放送！有排冇新野！（要等治媽報料）

治治：「媽媽，我覺得聖誕節好搞笑。」
治媽：「又有幾搞笑呀？」
治治：「即係呢，我同天父講話想要果樣禮物就會有果樣禮物囉。」
「咩天父呀？聖誕老人呀！」治媽連忙更正，也當然沒有講出聖誕禮物的真相，只是笑說：「你就好啦治治，想要乜就有乜。」
治治：「媽媽你都得架，好搞笑架，你都試下啦。」
治媽見治爸快要出使韓國，不捨地說：「咁我希望爸爸早Ｄ返香港啦。」
治治：「唔得架，要禮物先得架，唔係你想要點樣呀！同埋呢，要聖誕節果陣講至得架。」

ＸＸＸＸＸ

治治同表姊玩拋球遊戲，突然怪叫：「哎呀，表姐打到我私隱呀！」
治媽問：「講咩呀你？乜野私隱呀？」
治治：「個波打到個咕咕呀！」

ＸＸＸＸＸ

治治問治媽一個很嚴肅的問題：
「恐龍死曬之後，係人類丫嘛。咁人類死曬之後，係乜野類呀？」

ＸＸＸＸＸ

治治和治爸的恐龍遊戲玩法如下：
每人各拿三隻恐龍扭蛋，然後選出一隻對戰，猜拳，勝方可拿起扭蛋恐龍攻擊對方。
第一輪，治治猜拳勝出，打倒治爸的恐龍。
第二輪，治爸猜拳勝了，正要出擊的時候，治治喝止。
「咪住，我呢隻龍好搞笑架。」
治爸問：「又點搞笑法呀？」
「佢係呢，猜輸左呢，先至可以攻擊架！」然後治治出手攻擊，把治爸的恐龍打倒。
治爸笑到標眼淚，大敗。

ＸＸＸＸＸ

人家的小孩背誦唐詩三百首，治治卻只管死記＜100種珍奇恐龍圖鑑＞。
治爸問治治：「南方巨獸龍第幾頁呀？」
治治：「34！」
治爸問：「第78頁呢？」
治治：「森林龍！」
治爸問：「咁棘龍呢？」
治治：「55同57囉！」
治爸大奇：「點解有兩條既？」
治治：「因為兩條都係叫『棘龍』囉。」
治爸仍然不明白：「咁兩條『棘龍』有咩唔同呀？」
治治有點動氣：「我點知喎，我咁細個，又唔係科學家！」
治爸笑死後，揭開＜100種珍奇恐龍圖鑑＞，才知道一條是「棘龍」，另一條是「戟龍」。

ＸＸＸＸＸ

治治和浩浩最大的分別，包括：
治治頭髮又濃又密又黑，似治媽。浩浩又稀又疏又黃，似治爸。
治治是「旋轉狂」，甚麼拿上手，也要放在地上轉動一番，包括他自己。學會走路不久，便玩原地自轉，直到暈倒地上才罷休，最高紀錄是自轉三十八個圈。
浩浩是「置換狂」，最喜歡把「物件」從一件「容器」拿出來，放置到另一個「容器」裡。受害「物件」，由玩具、食物、衣物、地布到廚具不等。「容器」由玩具箱、紙盒、飯碗、廚櫃，連洗衣機也不放過。如果容器夠大，他便會拿走裡面所有物件，然後自己坐進去。
還有一點，浩浩非常有「手尾」，例如他從廚櫃拿出一隻鑊剷，會先關好廚櫃，才打開洗衣機，放鑊剷進去，接著他會關好洗衣機，再打開廚櫃拿出另一件東西……

粉紅童子＜書展番外篇＞

治治問：「爸爸，我同媽媽都放緊暑假，點解你仲未放既？」

ＸＸＸＸＸ

電視新聞報導今年書展生意不錯，銷量最好的包括小說及甚麼甚麼。
治治告訴治媽：「嘩！爸爸好叻呀，Ｄ小說好好賣呀。」
治媽：「世界上有好多人都會出小說，唔係剩係爸爸寫架。同埋今年爸爸都冇書出。」

何止冇書出，我可是忙碌得連書展也沒有去。
自九二年書展出版＜連環圖語言＞開始，我每年都會因工作到書展去，單位依次是「次文化堂」、「麥嘜」、「鐵道館」。如果沒有記錯的話，今年是十多年來第一次缺席，唉。

ＰＳ：謝謝Poseidon、FUCC，還有陸偉昌的支持。
不論新手老手（詳見＜卜洛克的小說學堂＞），寫作真是一件很孤獨的事情。

粉紅童子＜四十七＞

治治告訴治媽：「梁ＸＸ（同學）既爸爸四十一歲啦！」
治媽：「年齡係人地秘密黎架，唔可以隨便話比人聽架。」
治治：「咩呀？可以架，秘密可以話比一個人聽架！」

ＸＸＸＸＸ

北京奧運預告之類的電視節目放映中。
治治大喊螢幕上女記者／主持的名字：「李恩雞！」
治媽笑到碌地，連忙更正：「係『李思雅』呀！」

翌日，又到放映該節目的時段。
治媽故意問治治：「記唔記得姐姐叫咩名呀？」
治治笑了笑，滿臉自信：「『李思雞』丫嘛！」
治媽再次笑到碌地：「『李思雅』呀！冇人用個雞字黎做名架！」
治治搖頭表示反對：「『似雞龍』咪用個雞字做名囉！」

「似雞龍」是治治愛書＜１００恐龍珍奇寶鑑＞裡面其中一種恐龍。因外形似雞（其實似駝鳥多一點），故名「似雞龍」。

粉紅童子＜四十六＞

治治認識的詞彙不足，常常鬧出大小笑話，非常可愛。
例如他會把弟弟的「髮鑽」形容為「龍捲風」。
弟弟睡得甜，遲遲未醒，他會形容為「長龍覺」。
有次放學後，他向治媽投訴：「校巴裡面Ｄ冷氣好凍，搞到個人涼曬。」

ＸＸＸＸＸ

電視新聞報導馬英九當選台灣總統後的講話，治治看到字幕，大叫：「馬英九！」
治爸笑問：「你又知佢叫馬英九？」
治治一臉自信：「媽媽果邊個『馬』丫嘛！大口英個『英』丫嘛！一二三四五六七八九個『九』丫嘛！」
治爸問：「大口連我就識啫，邊個『大口英』呀？」
治治不耐煩：「＜古靈精探＞（註）裡面成日俾Madam Ying捉果個呀！」

ＸＸＸＸＸ

袁家到茶餐廳吃早餐。
治治自己讀餐牌：「咩叫『少爺牛肉麵』？辣唔辣架？」
治媽笑死：「係『沙爹牛肉麵』呀！」

ＸＸＸＸＸ

治媽與一眾姨媽拿著酒樓的酒席單張，商量父親節（主角是公公）的晚飯怎樣安排。
單張上印著醒目的大字：
每席＄1688 半席＄888
治治說：「嘩，『海鮮』好貴喎要1688，『羊鮮』平好多喎！」

註：＜古靈精探＞是無線電視的警匪劇，由郭晉安、郭羨妮主演。大口英一角則由大口青（王青）主演。

粉紅童子＜四十五＞

治治覬覦治爸的電動牙刷，問治媽：「媽媽，如果爸爸死左，我係咪可以用佢隻牙刷架？」

ＸＸＸＸＸ

治治問治媽：「你知唔知呀？」
治媽：「咩呀？」
治治：「住響海裡面果Ｄ叫海鮮。」
治媽：「係呀。」
治治：「住響泥果Ｄ就叫泥鮮。好似狗啦。住響草果Ｄ就係草鮮，Ｄ羊呀，Ｄ牛呀。咁住響天果Ｄ就係天鮮，雀仔果Ｄ囉。」
治媽笑：「咁仲有冇呀？」
治治：「頭鮮囉，Ｄ頭髮。」

ＸＸＸＸＸ

某日，吉之島玩具部‧高達模型，人頭湧湧。
治治大大聲問治爸：「爸爸，點解你成日睇高達既？」
數十雙眼睛盯著那名據稱很喜歡高達的爸爸。
治爸尷尷尬尬地細細聲答：「……唔……都唔係成日睇啫……」
治治大大聲：「乜高達靚咩？」
治爸覺得自己的褲子被拉下似的：「Ｏ…ＯＫ啦……咁你夠話『爆丸』靚啦！」
治治說：「都靚架。見你咁乖，我畫張生日咭比你啦。」
ＰＳ：生日咭雖然是治爸的，但我想向治治說聲：「治治生日快樂！五歲啦，好快Ｄ學識自己抹屎！」

粉紅童子＜四十四＞

清明節前夕，治治問治媽：「聽日係唔係有人死呀？」
治媽聽到一頭霧水：「咩話？」
治治：「跟住去拜年丫嘛！」
治媽：「『拜年』？你係唔係想講『拜山』呀？」
治治笑說：「……係呀係呀！同埋『大霧』丫嘛！」
治媽哭笑不得：「係『掃墓』呀！」

ＸＸＸＸＸ

治治頑皮，氣得治媽衝口而出說了句「信唔信我殺左你丫拿！」
治治眨眨眼：「咁你會唔會掃我墓架？」

ＸＸＸＸＸ

治爸的外婆過身，回鄉送葬。
治治問治媽：「咁爸爸以後仲番唔番黎架啦?」

ＸＸＸＸＸ

治治睡前說笑話：「有Ｄ人畫野，雖然畫得好靚，但係畫怪獸呢，就好醜樣。」

ＸＸＸＸＸ

治治穿上「轆轆鞋」，治媽替他戴上頭盔。
治治指著膝蓋：「咁保護呢度果舊野呢？」
治媽：「保護個頭既呢，叫做頭盔。保護膝頭既呢，就叫做護……咩呀？」
治治：「膝盔！」

開心大發現

早上與袁浩行公園，發現不明爬蟲。