新工作

兩個星期前，我還埋首寫作第二部真人演出的電影劇本。劇本不是委託（已有老細）的工作，而是福至心靈，想寫便寫（但又不適合寫成小說）。

自問SELL橋是笨得要死的，上天下地天花龍鳳地吹水絕不是強項，＜空想電影放送局＞的A絕對不是本人的寫照！所以還是回歸基本法，乖乖寫好一個完整的劇本，才在茫茫人海裡找尋願意投資的老闆。

突然一個無厘頭的來電，「神推鬼擁」，我被拉到＜長江七號‧動畫版＞的劇組裡，一個星期之後，我便身在北京出席那個電影發佈會，然後再跟負責製作的動畫團隊開了數天的會。到今天為止，剛好是兩個星期。

由於電影預計農曆年公映，算算日子，大概只有奇蹟才趕及映期。我不信奇蹟，只信努力。麥兜當年也是靠一股傻勁拍出來。雖然不若從前年輕力壯，但累積下來的經驗與技巧應可補助一下。下半年大部時間會長駐北京，孤身一個香港人與內地動畫團合作，想起來我也有點害怕。但不論這件工作多艱鉅，我也有一個非接不可的私人理由。剩下來的除了「拼了老命」外，也沒有甚麼可以多說了。

PS：內地封殺了BLOGSPOT，所以本BLOG將會進入半停頓狀態（跟早排訓身寫劇本差不多）。


北京商報六月十五日報導

中影進軍數字動漫市場首部作品與周星馳聯合出品《長江七號》動畫版

正在積極籌備上市的中影集團開始涉足數字動漫製作業務。本月8日，中影集團董事長韓三平在中影集團電影數字製作基地宣佈，將聯合周星馳出品《長江七號》動畫片。據悉，《長江七號》動畫版是中影集團數字基地建成後出產的第一部動畫片，與此同時，中影集團新成立的中影集團電影數字製作基地有限公司北京影院動畫製作分公司也正式浮出水面。

韓三平介紹，拍攝動畫片《長江七號》是受到三方面的啟發：首先是電影《長江七號》在2007年取得了2.02億的內地票房成績；其次是“七仔”的形象家喻戶曉；再有是去年動畫片《喜洋洋與灰太狼》的黑馬效應。所以，在中影數字基地建成後，就著手籌備拍《長江七號》動畫版的計劃，這次終於如願以償。據透露，《長江七號》動畫版總投資不會超過電影版，計劃于2010年春節檔上映，目前正在影片的製作階段。“雖然投資不會超過電影，但是我們希望票房能夠超過電影。”中影集團制片分公司總經理趙海城表示。

動畫版《長江七號》由中影集團及星輝海外有限公司聯合製作，並由中影集團公司制片分公司和中影集團電影數字製作基地有限公司北京影院動畫製作分公司完成全部製作。周星馳已將影片《長江七號》中的肖像和聲音授權給動畫版使用。曾執導過《麥兜的故事》、《菠蘿油王子》的香港著名動畫片導演袁建滔擔任本片導演；香港金牌編劇李敏將《長江七號》動畫版打造出較之《長江七號》更為積極、陽光的故事劇本，並且加入了環保主題，用原電影中的人物和背景講述一個全新的天馬行空的故事。趙海城透露，動畫片《長江七號》將採用2D和3D結合的製作方法，以2D為主，3D為輔，力求用多樣化的視覺效果和表現方式，製作出一部適合各年齡層觀衆的動畫影片。

據韓三平透露，“中影集團已經確定電影製作將分三大類進行。一是主流電影，二是商業大片，三是兒童影片。我們正在對兒童片進行觀念和戰略的轉型，我注意到，把中國的故事改編拍攝成的動漫、動畫片在世界上非常受歡迎”。或許，《長江七號》動畫版的啓動標誌了中影集團邁出兒童片轉型的第一步。

商報記者 吳穎

粉紅童子＜五十三＞

鄰居展開裝修工程，拆牆時傳來沉厚重擊聲。
治治：「咩聲黎架？」
治爸：「拆牆。」
治治：「嚇得我丫，仲以為暴龍行緊過黎。」

ＸＸＸＸＸ

治治：「美國人就好啦，有咁多恐龍（化石）。」
治媽：「佢地人多，多人掘啫。可能我地樓下都有呢。」
治治眼睛一閃：「不如聽日攞個叉落街掘囉！」

ＸＸＸＸＸ

治治喝「粟米薏米水」，吐出兩三條絲狀物。
治治：「咩黎架？」
治爸：「粟米鬚。」
治治：「下，Ｄ粟米老左呀？」

ＸＸＸＸＸ

治治在電梯大堂等候時，一邊喊熱，一邊高速跑來跑去。
治爸：「又話熱！仲跑？」
治治：「有風丫嘛！」

親子運吉團

五月三日，為了帶治治看螢火蟲，舉家十一人參加由「發達行」所辦的＄198「螢火蟲1天團 」，行程相當運吉，值得一記。

早上十時，一家大細在九龍塘理想酒店門外集合上旅遊巴。袁氏一家四口來得遲（其實準時，不過其他團友似乎精於此道，早早上車霸位），只好坐在車尾又熱又焗的發動機上。

車程１(約25分鐘） 九龍塘＞大埔大尾篤哥爾夫球練習場
大伙兒在球場逗留約一小時，勉強可以按行程做到「大人細路都可一嘗打哥爾夫球樂趣」……

車程２（約20分鐘） 大尾篤＞沙田龍華酒家
行程「歎乳鴿、沙田雞粥、豆腐花」。對上一次去龍華至少是25年前的事。小公園、孔雀仍在（應不是同一隻吧？）。乳鴿OK。雞粥？含腐竹的粥底尚可，但雞是雪雞雞柳。這樣子的概念「雞」「粥」非常「新鮮」。

車程３（約25分鐘） 沙田＞粉嶺坪輋士多啤利園
「真係今年 Last Call，帶你去有機士多啤梨園，自費選購及採摘新鮮士多啤梨」。小朋友落田玩得幾開心，大朋友又睇得幾開心。

車程４（約15分鐘） 粉嶺＞上水塱原
先以８元任食價「品嚐香滑新鮮豆腐花」，接著步行約10分鐘到濕地農莊，「玩全港獨有、人咁高的滾球『農吐珠』，這個由紐西蘭引入的 Zorb Ball 水陸步行球，玩的時候完全不用濕身卻可體驗在水上飄的滋味；場內另有機械馬玩。」龍吐珠30元玩10分鐘，治治與治媽、姨媽一起玩。小小的治治身處人肉洗衣機裡，險些給絞成碎塊，非常驚險，嚇死池邊掌控相機的治爸。車程５（約30分鐘） 上水＞元朗流浮山
時為5：30pm，豆腐花還未落膈，便要「享用」「鮑魚海鮮餐」……鮑魚＋海鮮＋餐，童叟無欺。

車程６（約30分鐘） 元朗＞大埔松仔園
一家老少拿著電筒，摸黑夜探郊野公園，走了20分鐘斜坡。如果大家運氣好，是「看猶如滿天繁星的螢火蟲」。我們運氣差，只得幾粒腎……模擬圖片

車程７（約20分鐘） 大埔＞九龍塘理想酒店
全人類散曬，應該入去酒店開房大覺訓。

本團建築面積10小時（朝十晚八），搭車運吉共約3小時，飲飲食食2.5小時，上山落山半小時，實用率約四成。
如果我講多兩句，大家實會講「玩左成日，收你＄198，仲想點呀？」
我想行程編排理性D，唔好浪費燃油行大運來揼波鐘囉。

http://hk.deals.travelzoo.com/Guangdong_Macau_HK/570882

PS：治治六歲了！

空想電影放送局＜一＞

這是約一個月前開始在雜誌＜MILK＞連載的專欄，經編輯同意在本BLOG轉載。

局長Q與嘍囉A的首次對話。

Q：你就係Ａ？睇落幾後生喎！
A：邊係。第一次見面，請局長多多指教就真。唔知最近想搞乜呢？
Q：＜一百萬零一夜＞咁收得，有冇野可以「致敬」一下？
A：索性拍個港版啦。講Ｎ年前一對由大陸偷渡來港既情侶，途中失散左。男人在老香港顛沛流離，飽歷滄桑，一心只想搵番佢既愛人。當然節目既問題同佢既經歷有關啦！
Q：例如呢？
A：例如……李嘉誠做乜野賺到第一桶金？a）穿錶帶 b）炒栗子 c）啤膠花 d）車bra。
Q：（點點頭）唔……咁佢第一份工就響膠花廠裡面黐膠花……
A：仲有「土製菠蘿」即係乜野、第五任港督係乜水、廉署邊一年成立、朱玲玲果屆香港小姐季軍係邊個、一百蚊人仔印左個邊個……諸如此類啦……
Q：不如抄埋＜阿甘正傳＞同＜奇幻逆緣＞，將近幾十年發生既大事，求求其其穿鑿附會寫落去……咪住，其實個男人玩「百萬富翁」又關果個失散多年既女友咩事呢？
A：佢諗住女友會睇電視見到佢嘛！
Q：（眉頭一皺）妖，響TVB播就有可能！唔得唔得，諗落「百萬富翁」響香港都係唔夠HEAT，唔WORK！
A：咁……咁不如搵TVB既GAME SHOW改篇啦！
Q：邊個先？唔好話俾我聽你可以將古巨基＜係咪小兒科＞寫部戲出來，你咁叻，不如改篇＜鐵甲無敵掌門人＞仲好過啦。
A：（雙眼放光）有得諗噃！記唔記得徐克響88年搞左部由葉倩文主演既＜鐵甲無敵瑪莉亞＞，戲裡面鐵甲美少女太戰ZAKU系機器人，成部＜攻殼機動隊＞咁！我地不如有樣學樣，將＜掌門人＞拍做史詩式科幻嬉春片，分分鐘撼贏＜變型金剛＞！
Q：嘩，你第一日出嚟撈呀？拍科幻片？咁貴？
A：……
Q：拍鬼戲就差唔多。
A：（眼珠一轉）不如將＜掌門人＞拍成茅山殭屍片啦，志偉一個師傅帶住兩個徒弟既格局，咪成部＜殭屍先生＞咁樣！
Q：錢小豪變錢嘉樂，樓南光變林曉峰……都啱噃。不過，殭屍片有動作，又要拍民初，好貴噃。許冠文個SHOW有冇得諗呀？
A：係唔係＜以一敵百＞……？
Q：＜一擲千金＞呀！都話剩係諗TVB既SHOW囉！
A：哦……好多女揸住個喼，同埋有條陰陰濕濕既BANKER果個……好難諗喎……
Q：就係難諗先至要你諗，唔係請你番嚟做咩呀？
Ａ：（你好似一個仙都未俾過我……）唔……
Q：（身體陷入大班椅，雙腳擱在檯上）點呀？有冇得攪呀？
A：拍鹹片囉！講條超級猛男慶烚烚去＜一擲千金＞，玩盡咁多條女，連個喼都唔放過！臨尾仲要揪埋個BANKER出來鞭……
Q：（黑面）……
Ａ：（吞口水）我講下笑啫……
Q：咳唔……計我話，如果連「六合彩」你都諗到部戲出嚟，我就話你叻啦！
Ａ：六合彩……有個人中左六合彩頭獎。佢買果六個號碼係抄自美國電視劇＜LOST＞既4、8、15、16、23、42。點解呢？因為每一個號碼，都同佢既人生有密切既關係……佢4歲死老豆，8歲死老母，15歲破處，16歲坐監，23歲放監，42歲睇LOST！
Q：……
A：……
Q：咁膚淺既？咪以為符符碌碌就過到關至得架。
A：符碌……咁不如調轉諗……叫＜負六合彩＞！
Q：點負法呀？中左頭獎要賠錢？
A：中左頭獎……就冇命……就有人上門幫你安樂死！唔好，忽然暴斃仲正！
Q：懸疑驚懍片，好吖，平平地。咪住，中左獎就冇命，仲邊有人去買架？邏輯上好似唔通喎！
A：唔……呢隻「負六合彩」唔係買既，係硬抽既！就抽你身份證號碼，抽中，就要死！好似日本仔果套＜死亡預告＞咁！
Q：咁邊個係主辦單位呀？
A：香港政府囉！背景係三十年後既香港，＜Blade Runner＞咁款！
Q：都話唔好諗科幻咯！
Ａ：參考下，等你容易入戲啫……到時全部香港人都老左三十歲，人口爆炸，老人又爆炸，政府庫房又爆炸，總之就冇水啦，於是成立一個＜人口減排委員會＞，立左條＜負人頭法＞，每日抽一百個人出來打靶！一年人口就可以減少三萬六千五百！
Q：嘩，年初一二三都打靶，冇陰公Ｄ噃，打人靶果條友都唔老利啦！
Ａ：……咁公眾假期豁免囉。
Q：咁違反人權既野，好難過到立法會噃。
Ａ：唓，可能果陣仲未有普選呢！
Q：咁又係……故事呢？
Ａ：講一個老農夫，抽中左，唔認命，利用原始武器對抗先進科技，揸住個鋤頭力戰成隊飛虎隊！由森林打到出市區，水塘打到出觀塘！勁呀！
Q：妖，都話唔好諗動作咯，貴呀！喂，今晚金多寶三千幾萬你買左未呀？
A：未呀……
Q：仲唔行！我中左頭獎就俾你拍啦，下個禮拜再吹過！
A：哦……

PS：我曾就本欄應該寫白話還是廣東話掙扎了一番，最後選擇「盡量克制」的廣東話，去到第五回更變為白話口語兩溝，覺得越寫越困難，跟心目中的水平相去甚遠……

FW：變形托馬斯

日本人能，為甚麼我們不能？

http://mashimax.blog86.fc2.com/blog-entry-304.html

爆漫

＜爆漫＞是＜死亡筆記＞原作者大場鶇和小田健再度攜手的新作。故事不怎麼了，兩名初中生，一個擅寫，一個擅畫，決心要在十八歲前成為成功的漫畫家。而成功的定義，是他們的作品會被改篇成為動畫。

其實我對小田健那種經漂白水洗擦過的畫風是有點抗拒。但這部作品的魅力，是揭開日本漫畫界在輝煌背後失落的一群。正如很多香港人只管說日本漫畫和美國電影怎麼好，卻從不用腦想一下，人家只有最好的作品才有出口的資格和價值。在「好漫畫」和「好電影」腳下，可踩著數不盡的平庸劣作。

以香港一個這樣細小的市場，本土漫畫和電影的表現其實已相當不錯。沒有人否認黃金年代已經過去，但業內仍留著一批有心人。現在最可怕的，不單單是市場萎縮，而是後繼無人。我相信＜爆漫＞這套「以漫畫為題的漫畫」的真正主題，仍是貼合＜少年JUMP＞的三大主旨：友情、冒險與勝利。

漫畫主角開始時並沒有當漫畫家的打算。他的叔叔是一名失意的漫畫家，自殺死了。死前曾說過：「畫出一部大熱作品，讓一輩子生活無憂，才算得上是漫畫家。不然，就只是賭徒！」然而，兩位少年決定押上自己的青春，去向一個成功率只有十萬份之一的冒險挑戰！

相信日本新一代跟香港差不多，奮鬥的意志和對追求夢想的動力，皆被電子遊戲和其他數不清的玩意消磨殆盡。單單是FACEBOOK便不知殺死大家多少看書的時間。我很羨慕日本人能夠出版一部「鼓勵少年畫漫畫」的漫畫，希望它不會像＜死亡筆記＞般越寫越爛……

附註：＜爆漫＞內提及梶原一騎立下的「漫畫家的五大天條」
1）絕對不能畫賣弄小聰明的作品，把你的血全部化為墨水吧！
2）千萬不可追逐花樣般的人氣，應翻鬆泥土，把根部培育得更粗壯！
3）不要眷戀得來的些微地位，應在暴風雨與風平浪靜間，選擇暴風雨！
4）任何時候輸了也不能哭，應謹記失敗乃成功之母！
5）即使堅守以上各項，也不能自以為是，應把所有外人都視為老師！

推："希特拉" 都取消唔到有線合約

Eminleo君很利害，不單老作對白，還能配合演員、剪接、節奏，強！

PS：我跟有線電視其實頗有淵源。浸會同學有份作開荒牛，治媽也曾在裡面打工。我也曾替YMC台試作Station ID（時為九五年左右），家裡也是有線的「老客戶」。
但由兩年前搬家開始，有線電視不斷做出一些令我由不滿、氣憤，甚至乎最後要報警也不能解決的事情。千辛萬苦CUT掉有線後的某一天，有個營業員打給我，問我這名多年的舊客為什麼要CUT。我把他們這兩年的惡行逐一數出來給那位小姐聽，然後反問她：「咁你覺得我應唔應該CUT你地吖？」小姐都聽到呆左，唔敢再SELL落去。

粉紅童子＜五十二＞

經治爸追問，治治如下解釋他的六格漫畫：

1）有人飲酒
2）飲曬D酒（握著空杯）
3）行街（那三點不明物體是路人）
4）嘔
5）嘔唔出
6）嘔左劈屎