Wednesday, April 22, 2009

空想電影放送局<一>


這是約一個月前開始在雜誌<MILK>連載的專欄,經編輯同意在本BLOG轉載。

局長Q與嘍囉A的首次對話。

Q:你就係A?睇落幾後生喎!
A:邊係。第一次見面,請局長多多指教就真。唔知最近想搞乜呢?
Q:<一百萬零一夜>咁收得,有冇野可以「致敬」一下?
A:索性拍個港版啦。講N年前一對由大陸偷渡來港既情侶,途中失散左。男人在老香港顛沛流離,飽歷滄桑,一心只想搵番佢既愛人。當然節目既問題同佢既經歷有關啦!
Q:例如呢?
A:例如……李嘉誠做乜野賺到第一桶金?a)穿錶帶 b)炒栗子 c)啤膠花 d)車bra。
Q:(點點頭)唔……咁佢第一份工就響膠花廠裡面黐膠花……
A:仲有「土製菠蘿」即係乜野、第五任港督係乜水、廉署邊一年成立、朱玲玲果屆香港小姐季軍係邊個、一百蚊人仔印左個邊個……諸如此類啦……
Q:不如抄埋<阿甘正傳>同<奇幻逆緣>,將近幾十年發生既大事,求求其其穿鑿附會寫落去……咪住,其實個男人玩「百萬富翁」又關果個失散多年既女友咩事呢?
A:佢諗住女友會睇電視見到佢嘛!
Q:(眉頭一皺)妖,響TVB播就有可能!唔得唔得,諗落「百萬富翁」響香港都係唔夠HEAT,唔WORK!
A:咁……咁不如搵TVB既GAME SHOW改篇啦!
Q:邊個先?唔好話俾我聽你可以將古巨基<係咪小兒科>寫部戲出來,你咁叻,不如改篇<鐵甲無敵掌門人>仲好過啦。
A:(雙眼放光)有得諗噃!記唔記得徐克響88年搞左部由葉倩文主演既<鐵甲無敵瑪莉亞>,戲裡面鐵甲美少女太戰ZAKU系機器人,成部<攻殼機動隊>咁!我地不如有樣學樣,將<掌門人>拍做史詩式科幻嬉春片,分分鐘撼贏<變型金剛>!
Q:嘩,你第一日出嚟撈呀?拍科幻片?咁貴?
A:……
Q:拍鬼戲就差唔多。
A:(眼珠一轉)不如將<掌門人>拍成茅山殭屍片啦,志偉一個師傅帶住兩個徒弟既格局,咪成部<殭屍先生>咁樣!
Q:錢小豪變錢嘉樂,樓南光變林曉峰……都啱噃。不過,殭屍片有動作,又要拍民初,好貴噃。許冠文個SHOW有冇得諗呀?
A:係唔係<以一敵百>……?
Q:<一擲千金>呀!都話剩係諗TVB既SHOW囉!
A:哦……好多女揸住個喼,同埋有條陰陰濕濕既BANKER果個……好難諗喎……
Q:就係難諗先至要你諗,唔係請你番嚟做咩呀?
A:(你好似一個仙都未俾過我……)唔……
Q:(身體陷入大班椅,雙腳擱在檯上)點呀?有冇得攪呀?
A:拍鹹片囉!講條超級猛男慶烚烚去<一擲千金>,玩盡咁多條女,連個喼都唔放過!臨尾仲要揪埋個BANKER出來鞭……
Q:(黑面)……
A:(吞口水)我講下笑啫……
Q:咳唔……計我話,如果連「六合彩」你都諗到部戲出嚟,我就話你叻啦!
A:六合彩……有個人中左六合彩頭獎。佢買果六個號碼係抄自美國電視劇<LOST>既4、8、15、16、23、42。點解呢?因為每一個號碼,都同佢既人生有密切既關係……佢4歲死老豆,8歲死老母,15歲破處,16歲坐監,23歲放監,42歲睇LOST!
Q:……
A:……
Q:咁膚淺既?咪以為符符碌碌就過到關至得架。
A:符碌……咁不如調轉諗……叫<負六合彩>!
Q:點負法呀?中左頭獎要賠錢?
A:中左頭獎……就冇命……就有人上門幫你安樂死!唔好,忽然暴斃仲正!
Q:懸疑驚懍片,好吖,平平地。咪住,中左獎就冇命,仲邊有人去買架?邏輯上好似唔通喎!
A:唔……呢隻「負六合彩」唔係買既,係硬抽既!就抽你身份證號碼,抽中,就要死!好似日本仔果套<死亡預告>咁!
Q:咁邊個係主辦單位呀?
A:香港政府囉!背景係三十年後既香港,<Blade Runner>咁款!
Q:都話唔好諗科幻咯!
A:參考下,等你容易入戲啫……到時全部香港人都老左三十歲,人口爆炸,老人又爆炸,政府庫房又爆炸,總之就冇水啦,於是成立一個<人口減排委員會>,立左條<負人頭法>,每日抽一百個人出來打靶!一年人口就可以減少三萬六千五百!
Q:嘩,年初一二三都打靶,冇陰公D噃,打人靶果條友都唔老利啦!
A:……咁公眾假期豁免囉。
Q:咁違反人權既野,好難過到立法會噃。
A:唓,可能果陣仲未有普選呢!
Q:咁又係……故事呢?
A:講一個老農夫,抽中左,唔認命,利用原始武器對抗先進科技,揸住個鋤頭力戰成隊飛虎隊!由森林打到出市區,水塘打到出觀塘!勁呀!
Q:妖,都話唔好諗動作咯,貴呀!喂,今晚金多寶三千幾萬你買左未呀?
A:未呀……
Q:仲唔行!我中左頭獎就俾你拍啦,下個禮拜再吹過!
A:哦……

PS:我曾就本欄應該寫白話還是廣東話掙扎了一番,最後選擇「盡量克制」的廣東話,去到第五回更變為白話口語兩溝,覺得越寫越困難,跟心目中的水平相去甚遠……

Thursday, April 16, 2009