這是約一個月前開始在雜誌＜MILK＞連載的專欄，經編輯同意在本BLOG轉載。
局長Q與嘍囉A的首次對話。
Q：你就係Ａ？睇落幾後生喎！
A：邊係。第一次見面，請局長多多指教就真。唔知最近想搞乜呢？
Q：＜一百萬零一夜＞咁收得，有冇野可以「致敬」一下？
A：索性拍個港版啦。講Ｎ年前一對由大陸偷渡來港既情侶，途中失散左。男人在老香港顛沛流離，飽歷滄桑，一心只想搵番佢既愛人。當然節目既問題同佢既經歷有關啦！
Q：例如呢？
A：例如……李嘉誠做乜野賺到第一桶金？a）穿錶帶 b）炒栗子 c）啤膠花 d）車bra。
Q：（點點頭）唔……咁佢第一份工就響膠花廠裡面黐膠花……
A：仲有「土製菠蘿」即係乜野、第五任港督係乜水、廉署邊一年成立、朱玲玲果屆香港小姐季軍係邊個、一百蚊人仔印左個邊個……諸如此類啦……
Q：不如抄埋＜阿甘正傳＞同＜奇幻逆緣＞，將近幾十年發生既大事，求求其其穿鑿附會寫落去……咪住，其實個男人玩「百萬富翁」又關果個失散多年既女友咩事呢？
A：佢諗住女友會睇電視見到佢嘛！
Q：（眉頭一皺）妖，響TVB播就有可能！唔得唔得，諗落「百萬富翁」響香港都係唔夠HEAT，唔WORK！
A：咁……咁不如搵TVB既GAME SHOW改篇啦！
Q：邊個先？唔好話俾我聽你可以將古巨基＜係咪小兒科＞寫部戲出來，你咁叻，不如改篇＜鐵甲無敵掌門人＞仲好過啦。
A：（雙眼放光）有得諗噃！記唔記得徐克響88年搞左部由葉倩文主演既＜鐵甲無敵瑪莉亞＞，戲裡面鐵甲美少女太戰ZAKU系機器人，成部＜攻殼機動隊＞咁！我地不如有樣學樣，將＜掌門人＞拍做史詩式科幻嬉春片，分分鐘撼贏＜變型金剛＞！
Q：嘩，你第一日出嚟撈呀？拍科幻片？咁貴？
A：……
Q：拍鬼戲就差唔多。
A：（眼珠一轉）不如將＜掌門人＞拍成茅山殭屍片啦，志偉一個師傅帶住兩個徒弟既格局，咪成部＜殭屍先生＞咁樣！
Q：錢小豪變錢嘉樂，樓南光變林曉峰……都啱噃。不過，殭屍片有動作，又要拍民初，好貴噃。許冠文個SHOW有冇得諗呀？
A：係唔係＜以一敵百＞……？
Q：＜一擲千金＞呀！都話剩係諗TVB既SHOW囉！
A：哦……好多女揸住個喼，同埋有條陰陰濕濕既BANKER果個……好難諗喎……
Q：就係難諗先至要你諗，唔係請你番嚟做咩呀？
Ａ：（你好似一個仙都未俾過我……）唔……
Q：（身體陷入大班椅，雙腳擱在檯上）點呀？有冇得攪呀？
A：拍鹹片囉！講條超級猛男慶烚烚去＜一擲千金＞，玩盡咁多條女，連個喼都唔放過！臨尾仲要揪埋個BANKER出來鞭……
Q：（黑面）……
Ａ：（吞口水）我講下笑啫……
Q：咳唔……計我話，如果連「六合彩」你都諗到部戲出嚟，我就話你叻啦！
Ａ：六合彩……有個人中左六合彩頭獎。佢買果六個號碼係抄自美國電視劇＜LOST＞既4、8、15、16、23、42。點解呢？因為每一個號碼，都同佢既人生有密切既關係……佢4歲死老豆，8歲死老母，15歲破處，16歲坐監，23歲放監，42歲睇LOST！
Q：……
A：……
Q：咁膚淺既？咪以為符符碌碌就過到關至得架。
A：符碌……咁不如調轉諗……叫＜負六合彩＞！
Q：點負法呀？中左頭獎要賠錢？
A：中左頭獎……就冇命……就有人上門幫你安樂死！唔好，忽然暴斃仲正！
Q：懸疑驚懍片，好吖，平平地。咪住，中左獎就冇命，仲邊有人去買架？邏輯上好似唔通喎！
A：唔……呢隻「負六合彩」唔係買既，係硬抽既！就抽你身份證號碼，抽中，就要死！好似日本仔果套＜死亡預告＞咁！
Q：咁邊個係主辦單位呀？
A：香港政府囉！背景係三十年後既香港，＜Blade Runner＞咁款！
Q：都話唔好諗科幻咯！
Ａ：參考下，等你容易入戲啫……到時全部香港人都老左三十歲，人口爆炸，老人又爆炸，政府庫房又爆炸，總之就冇水啦，於是成立一個＜人口減排委員會＞，立左條＜負人頭法＞，每日抽一百個人出來打靶！一年人口就可以減少三萬六千五百！
Q：嘩，年初一二三都打靶，冇陰公Ｄ噃，打人靶果條友都唔老利啦！
Ａ：……咁公眾假期豁免囉。
Q：咁違反人權既野，好難過到立法會噃。
Ａ：唓，可能果陣仲未有普選呢！
Q：咁又係……故事呢？
Ａ：講一個老農夫，抽中左，唔認命，利用原始武器對抗先進科技，揸住個鋤頭力戰成隊飛虎隊！由森林打到出市區，水塘打到出觀塘！勁呀！
Q：妖，都話唔好諗動作咯，貴呀！喂，今晚金多寶三千幾萬你買左未呀？
A：未呀……
Q：仲唔行！我中左頭獎就俾你拍啦，下個禮拜再吹過！
A：哦……
PS：我曾就本欄應該寫白話還是廣東話掙扎了一番，最後選擇「盡量克制」的廣東話，去到第五回更變為白話口語兩溝，覺得越寫越困難，跟心目中的水平相去甚遠……
