粉紅童子＜四十二＞

治治乖，治媽請他到麥當勞吃雪糕。
治媽：「點呀？食咩雪糕呀？」
治治：「食『通常』果Ｄ白色雪糕就得啦。」

治治經常混淆「通常」的用法，例如一些應該說「普通」、「基本」、「成日 ＸＸＸ」、「Ｘ開」（不要心邪……舉個例，『食開果Ｄ雪糕』）的場合，他會用了「通常」，有點像治爸學英語，一見到always、usually、often、normally、commonly、ordinarily便頭痛一樣。

ＸＸＸＸＸ

治治用LEGO砌了台「飛機」，用手提著盤旋：「爸爸，呢隻飛機Ｄ飛彈好犀利，專打壞人架。」
治爸：「咁勁？咁佢點分好人定壞人架？」
治治：「著黑色衫果Ｄ咪壞人囉！」
治爸：「咁好人著咩色衫架？」
治治：「藍色囉，警察著藍色衫架！」
治爸：「咁著紅衫係好人定壞人？」
治治：「好人！紅色衫係消防員。」
治爸：「黃色呢？」
治治：「好人！黃色係報警果Ｄ人。」
治爸：「綠色呢？」
治治：「係童軍同士兵。」
治爸：「橙色呢？」
治治：「記者。」
治爸：「紫色呢？」
治治：「……唔知。」
治爸：「白色呢？」
治治：「警察囉！白色同黑色都係警察。」
治爸：「頭先你又話著黑色衫係賊既？」
治治：「唉，兩隻黑色唔同架。Ｄ賊係黑色，Ｄ警察係深黑色！」
治爸：「深黑色？黑色已經係最深架啦……」
治治開始不耐煩：「唉，深過黑色果Ｄ咪深黑色囉！」
治爸：「……哦。」