麻辣肥牛豆腐凍？

就本煮食教學短片，我有幾樣野諗唔明。
1）點解要帶雙咁騎呢既膠手套？做手術咩？定係揸左新甲油？又定係秘撈，驚俾人認得出對手？
2）麻醬加辣醬等如「麻辣」？咪玩啦。
3）一大舊牛肉淋上醃料（豉油、糖），話驚整爛，唔可以撈均……咁炒果陣又成舊撻落去……跟住又用筷子整散佢……其實肥牛咁薄，駛乜醃啫？
4）咁煞有介事蒸舊豆腐，去頭去尾，原來同Ｄ牛肉毫無關係，汁都唔淋，咁即係點呢？
5）呢味菜究竟點食呢？用筷子夾舊捲得靚靚既「麻辣」肥牛，然後再用匙根筆一忽搭檯既豆腐，一齊擺入口撈埋黎食？咦，差Ｄ唔記得墊屍底果Ｄ翡翠苗添……
6）最後，也是最重要，「ＸＸ凍」的「凍」字是有其特殊意義，不可隨便放到尾（小弟正因為ＸＸ凍這菜名引起我的好奇心，才觀看本片）。所以本菜應正名為「麻醬加辣醬肥牛卷伴原味凍豆腐」。

鉛筆怪獸

其他怪獸

PS:其實仲幾隻怪獸，可惜多番努力，都找不到原來的LINK，激死！

粉紅童子＜四十五＞

治治覬覦治爸的電動牙刷，問治媽：「媽媽，如果爸爸死左，我係咪可以用佢隻牙刷架？」

ＸＸＸＸＸ

治治問治媽：「你知唔知呀？」
治媽：「咩呀？」
治治：「住響海裡面果Ｄ叫海鮮。」
治媽：「係呀。」
治治：「住響泥果Ｄ就叫泥鮮。好似狗啦。住響草果Ｄ就係草鮮，Ｄ羊呀，Ｄ牛呀。咁住響天果Ｄ就係天鮮，雀仔果Ｄ囉。」
治媽笑：「咁仲有冇呀？」
治治：「頭鮮囉，Ｄ頭髮。」

ＸＸＸＸＸ

某日，吉之島玩具部‧高達模型，人頭湧湧。
治治大大聲問治爸：「爸爸，點解你成日睇高達既？」
數十雙眼睛盯著那名據稱很喜歡高達的爸爸。
治爸尷尷尬尬地細細聲答：「……唔……都唔係成日睇啫……」
治治大大聲：「乜高達靚咩？」
治爸覺得自己的褲子被拉下似的：「Ｏ…ＯＫ啦……咁你夠話『爆丸』靚啦！」
治治說：「都靚架。見你咁乖，我畫張生日咭比你啦。」
ＰＳ：生日咭雖然是治爸的，但我想向治治說聲：「治治生日快樂！五歲啦，好快Ｄ學識自己抹屎！」