粉紅童子＜二十六＞

爸爸手機響起，是治治來電。

治：「爸爸，對唔住呀。」

爸：「做乜對唔住呀？」

治：「頭先打俾你，我打錯9042XXXX呀！」

爸忍笑：「你冇對我唔住。不如你打番頭先果個電話，同佢講對唔住啦。」

治：「哦。」

ＸＸＸＸＸ

治治WORD裡亂打了一篇字，覺得「好靚」，要我打印出來。

治治一手拿著那「好靚」的印稿，一手在空氣中畫了一個長方型：「爸爸，有冇果個『咁咁咁咁』呀？」

爸爸其實知道治治所指的是甚麼，但看著他拼命想也想不出「咁咁咁咁」的名字，實在很有趣，便扮作不知，順道鼓勵一下他的想像力。「乜野『咁咁咁咁』呀，我唔知你講咩喎。」

治再想：「呃……好似電視機果個呢……」

爸笑：「哦！你想要個畫框裱起佢！」

治笑：「係呀係呀，畫框呀！」

故事背景：在某新買回來的家電裡，有三塊約A4大，中間開了方洞，狀似畫框的紙皮。爸爸把其中一塊裱起治治的畫，自此他便有「畫框」和「裱畫」的概念。某天他在紙上畫了「A1」兩字，然後用膠水黏著畫框，放在單車籃上扮車牌。

ＸＸＸＸＸ

爸太累，想睏。治硬拉著講故事，要聽Thomas火車頭。

爸連書也懶得翻，於是兩爸子倒在床上，隨口便說了個「超低能、悶到爆」的故事，希望悶倒治治快點入睡。

「從前有個火車頭叫Thomas，佢只係火車站度跟頭跟尾，冇得出街周圍行。佢好想學Gordon咁，有自己既行車線，由美孚到尖沙嘴。

機會終於黎啦！有一日，Gordon叫佢先學下跟車，於是Thomas由美孚開始跟住Ｇ既尾，轟隆轟隆。下一站係茘枝角，The Next Station is Lai Chi Kok。轟隆轟隆。下一站係長沙灣……終點站尖沙嘴，所有乘客請落車……。

Thomas問Gordon：『我跟完啦，幾時可以有條自己既行車線呀？』

Ｇ：『就而家啦。一陣由尖沙嘴番美孚，你拉，我跟，好唔好？』

Ｔ好高興：『好呀！』

Ｇ：『不過你要請我食五粒糖個喎。』

Ｔ：『但係我得三粒咋。』

Ｇ：『唔……咁你請我食一粒啦。』

Ｔ：『咁我就剩番兩粒啦。』

Ｇ：『哎呀，都係唔好。不如你請我食多一粒，好唔好？』

Ｔ：『好呀。』

Ｇ：『你有三粒，請我食兩粒，咁即係你剩番一粒咯。』

Ｔ：『係喎。ＯＫ，可以開車啦！』

轟隆轟隆。下一站係佐敦，The Next Station is Jordan……終點站美孚，所有乘客請落車……。」

空氣一片死寂。

爸心想：「今次仲唔悶到你睏！」

豈料治治突然張開眼：「講完嗱？」

爸（心虛）：「……係呀，講完啦。」

治：「咁跟住點呀？」

爸：「跟住……Thomas咪自己由美孚拉車去尖沙嘴咯，仲聽唔聽吖？」

治轉身：「唔聽啦，睏啦。」

爸心想：「好野！！」