Tuesday, September 19, 2006

做兄弟

星期一,做兄弟。晨咁早,扑起身。
接新娘,例牌貨。幾廿歲,真係甘。
掌上壓,唔少得。甜酸食,苦辣飲。
搞左輪,過曬關。敬完茶,番男家。
拜過神,又敬茶。敬完茶,去酒家。
飲完茶,等開局。打天九,大喧嘩。
講講笑,影影相,食食野,隊隊酒。
玩新人,咁上下,番屋企,大教訓。

PS1:姊妹話我似肥版馬浚偉!邊忽似呀?

PS2:新郎阿姨,家住蠻夷,年前閱報,看我報導。昨天碰面,竟然認得出我係邊個!有冇咁好記性呀!

PS3:跟專業婚禮攝影師閒談,問了一點問題:

Q:有冇試過拍人響水底或者公廁結婚?
A:冇。

Q:除了政治部門、教堂外,仲可以響邊度結婚?
A:伊甸園,某專營婚禮的私人地方。黃大仙廟,可舉行道教婚禮,類似睇民初片的服飾,要搞幾粒鐘。

Q:接新娘/玩新人有冇試過反面、打交?
A:有反,冇打。最嚴重一次,男女家有江湖背景,飲大兩杯,新仇舊恨……幸好最後仍壓得住。亦有主人家跟部長伙記大炒,或者跟佢老哥大炒。事緣攝影師安排男女家輪流影相,男家覺得佢偏幫女家,成日打尖,女家又覺得佢偏幫男家……

Q:你去飲多過食飯,邊家最掂?
A:聘珍樓。

Q:邊間最唔得?
A:好難講。擺得越多枱,瀨野機會越大。但PL酒店,有好幾次在席間發生衝突,可能風水唔老利。

Q:點解影相果陣,你成日要我地做V字手勢?
A:……香港人呀嘛!

3 comments:

治治契媽 said...

嘩,唔係瓜,你竟然去做兄弟,估你唔到喎!

felix said...

唱完K再做兄弟,一不離二啊

袁建滔 said...

呵呵!
咁容易俾你估到,就唔係食神啦!