粉紅童子＜二十八＞

爸爸極累，勸治治早點上床。
治治扁嘴：「你都未講故仔。」
爸爸毫無誠意：「從前有隻豬，死左。訓！」
治治不屑：「啐，咁無聊既你。」

ＸＸＸＸＸ

爸爸想治治學習洗頭，但他既怕水入眼，亦堅拒學習閉眼，氣死爸媽。於是爸爸抓緊每個機會去「遊說」。

治治聽說同學去過溜冰。「爸爸，你幾時帶我去溜冰呀？」
爸爸：「等你學識游水先啦。」
治治：「點解呀？」
爸爸：「溜冰場Ｄ冰下面係水黎架，如果穿左跌落去，咪浸死咯？不過你要學識洗頭先，唔識洗頭，又點識游水呢？」
治治：「……咁不如三十七歲果陣學揸車啦！」
爸爸：「都好吖。不過學揸車之前，都係要學游水先。」
治治：「點解呀？」
爸爸：「一陣揸揸下車，架車跌左落水，咪浸死咯？不過你要學識洗頭先，唔識洗頭，又點識游水呢？」
治治：「咁無聊既你。」