Friday, December 26, 2008

粉紅童子<五十一>

父子闊別四月,一起到平台公園踏單車踢足球。
一名多時不見的男孩,手裡拿著一盒好像叫「鎖匙戰士」的玩具,跑過來跟治治玩。
治治:「嘩,你盒野好靚呀!」
男孩:「係呀!要成一百九十九蚊,好貴架!你知唔知幾好笑呀,我爸爸比左二百蚊,佢找番一蚊咋,笑死我!」
治治大笑:「係囉,咁好笑既!比左二百蚊,找番一蚊既!」

XXXXX

治治那位移居美國的舅父回港過聖誕。
治爸問治治:「其實你知唔知美國舅父即係邊個?」
治治:「唔知喎。」
治爸:「佢係婆婆個仔,你媽媽既哥哥呀!」
治治:「嘩,乜婆婆咁多個仔架(兩個),佢地細個咁曳,阿婆以前咪好辛苦囉!」
治爸:「係你同細佬兩個曳啫,舅父佢地細個好乖架。」
治治:「都辛苦架,阿婆生咁多個,成日要入醫院割肚!」

XXXXX

婆婆愛作串珠小手工,應承治治在聖誕前替他串一頭大象,但「死線」屆滿,尚欠頭部未能完成。
治治大感不滿:「爭少少,點解唔穿埋佢呀?」
婆婆:「大佬呀,尋晚我已經穿到三更半夜架啦!」
治治更不滿:「咁點解你唔日頭穿啫?」
治媽喝止治治:「咁婆婆日頭都有好多野做家嘛!」
治治:「阿婆退左休都冇工番,邊有野做架!」

3 comments:

Anonymous said...

恭喜恭喜!回家最好!:D

Anonymous said...

好好笑呀!!!! 我鍾意睇同細路仔的對話.

Anonymous said...

祝賀粉紅童子回歸!唔知粉藍童子又點樣呢?