粉紅童子＜十八＞

治治拿著爺爺的蘋果日報，指著報章角落的一位女士，不斷大叫「叉燒黃」。
治媽看著相片呆了半晌，才意會到治治說的其實是「蘇絲黃」，皆因他常跟我們一起看＜一粒鐘真人蘇＞，才有此誤會。
相中人其實是曾慧怡女士，職銜是奧運馬術比賽（香港）有限公司高級經理（公共關係）。

＊＊圖片來自蘋果日報＊＊

ＸＸＸＸＸ

在家工作中，治治突然跑過來對我說：「爸爸，其實我好鐘意你個喎。」
爸笑：「我都係喎。」
治治：「不如我地做好朋友吖！」
爸當然說好。「唔知你十歲果陣，仲當唔當我係朋友呢……」
治治：「嘩！十歲？好老個喎！」
爸忍笑。「咁老左都可以做朋友架！」
治治：「真既？咁好笑既！」

ＸＸＸＸＸ

爸媽忙了一整天，累極。但治治深夜時份仍不願入睡，要我講故事。
我對治治說，只講一個故事，聽完便得乖乖去睡。
「從前有三隻小肥豬，死左，跟住俾人劏左，變做叉燒。講完，訓覺。」
治治不滿：「咁短既？」
爸：「係呀，Ｄ豬條命都幾短架。」
治治：「叉燒用豬做架？」
爸：「係呀，好殘忍架。不如以後剩係食菜啦。」
治治古惑地笑：「但係我好鐘意食叉燒架。」
爸：「得啦。訓覺。」