粉紅童子＜十五＞

晚飯後水果時間。爸爸想吃桃，拿起一個，湊近治治鼻前：「聞下個桃，D桃味好香呀，不如食桃啦！」
治拼命搖頭：「唔食桃，我想食黃色果個呀。」
爸：「你講得出叫咩名，我就俾你食。」
治想了一會：「水晶梨！」
爸大樂，正準備切梨之際，治喝止。
治：「俾我聞下D水晶味先啦！」

ＸＸＸＸＸ

為了迫治治午睡，治爸和媽一起詐訓。
治不高興：「嘖，你地唔理我既，剩係掛住訓覺。」
然後打電話給外婆投訴。爸怕治亂打，無奈起身監視著整個打電話過程。
治：「婆婆，佢地唔理我呀。」
婆：「佢地做乜唔理你呀？」（估計對白）
治：「佢地訓曬覺唔理我咯。不如你過黎陪我玩啦。」

ＸＸＸＸＸ

治把玩具車逐架逐排在飯桌上。每放好一架，便數一數。如是者，由一排到二十九架，也由一數到二十九。
之後，治拿著一架玩具車，猶豫半晌，也放不下，終於向治媽求救：「二十九跟住到咩呀？」
媽：「二跟住到咩呀？」
治：「三。」
媽：「咁九跟住到咩呀？」
治：「十」
媽：「所以二十九之後咪到三十囉！」
治高興地放下玩具車，大叫「三十」。然後再放下另一部車，大叫「三十十」……