清明遊

4月5日，周三。清明節，大市休假一天。難得有日假，兼夾有親從遠方來，於是扶老携幼到大佛一遊。未上大佛，眾行友先被「心經簡林」既路牌吸引住，於是決定先行一看。
行友甲在搭車上山途中已經訓左，難為行友乙同行友丙做人肉搖籃，抱住三十磅既行友甲入去簡林，係咁行，係咁行。上上落落，大大話話行左二十分鐘至到。好彩行友甲半路已經醒左，自己落地走，一路行，一路問：「雪糕呢？」行友乙話：「你自己行到尾，就有得食。」
之前聽過行「心經簡林」既介紹，仲以為每條雕上心經的木條同一個坐地喇叭差不多大，豈料現場所見，每碌木都成棵樹咁高，隻隻字都大過隻黑膠唱片，都咪話唔壯觀。一陣濃霧從山下吹上來，整到「簡林」成個大墳墓咁，幾好FEEL。行友甲話驚，又話要食雪糕，於是大伙兒鬆人，向著原來目的地出發。
大佛高高在上，長長的天梯在霧中不見盡頭。行友甲行左冇耐就問：「雪糕呢？」行友丙話：「你自己行到尾，就有雪糕食。」幾經辛苦，眾行友上到佛腳，睇埋舍利子後散水。行友甲問：「雪糕呢？」行友乙答：「你自己行落樓梯，就買俾你食啦。」萬水千山，終於來到售賣山水豆腐花的士多。眾行友正研究食豆腐花定係芝麻糊定係兩溝既時候，行友甲終於可以享用等左成日／行左成日至有得食既朱古力雪糕。
眾行友筋疲力竭搭車落東涌，途徑石壁水塘大壩。行友乙見壩下的渡假村頗具規模，問：「豪宅乎？」行友丙曰：「監獄也。」旅發局加左人工既高層請注意，心經簡林被茶園餐廳騎劫，唔該出手